Bilinguismuimparis.net

Circa in su giassu
Biddesatu :: News

Biddesatu. Sa stÚria

Biddesatu. Sa stÚria

Biddesatu, oi, contat 1146 ànimas. Sa bidda dominat sa cea de su Flumendosa. Is crèsias de Santa Bràbara e de Santu Micheli Arcàngelu faint pensai ca Biddesatu est nàsciu in su Mesuevu.

Si pensat ca is primus a bivi in bidda furiant genti de atras biddixeddas, agoa sparèssias, e de atrus logus de sa Sardìnnia. Scedas de sa dominatzioni Sabàuda chistionant de Biddesatu cumenti unu logu arricu de padentis e mitzas e pagu popolau cumenti is atrus logus de su Gerrei.

Aintru de is provedimentus governativus nci fut sa costrutzioni de sa ‘ia chi acàpiat su Gerrei a su Campidanu chi is Biddesatesus iant pagau cun sa bèndida de pa(r)ti de is terras.

Gràtzias a sa nàscida de custa ‘ia chi acàpiat su Gerrei a su Campidanu is ci(r)cadoris lìgurus e francesus iant agatau medas mineralis e custu at fatu nasci sa Mina de Su Suèrgiu; importanti po sa stòria de sa comunidadi e de su logu.

In su 1906 in Biddesatu e in su logu de Igrèsias nc’est stètia una protesta manna po is prètzius tropu a(r)tus de sa cosa ‘e papai e de sa vida in generali. In bidda nc’est una “stele” po arrego(r)dai is mo(r)tus e unu libru chi contat beni totu su contu.

Sa zona est arrica de olia, modditzi, lioni, mudregu, sparau, cadrollinus e padentis mannus de ìlixi e suèxu. S'agatant in sa zona: c(i)rebus, muvras,achillis, storis, e sribonis.

Fait a agatai ‘omixeddas in is o(r)tus unias de bias piticheddas chi oi permitint de arribai in dònnia logu cumenti fiant is pastoris e is minadoris dònnia di’.

Is domus de Biddesatu funt un esèmpiu de costrutzionis bellas cun àngulus de Sardìnnia antiga.

Nci funt montis a(r)tus 1000 metrus e medas ceas cun arrius chi arribant a su Flumendosa.

Biddesatu cun sa Mina de antimòniu de Su Suèrgiu est una àrea de interessu mannu de su Parcu Geominèrariu de Sardìnnia. Funt medas is minas de su Gerrei chi dipendiant de sa Mina de Su Suèrgiu de Biddesatu. In custa mina in su 1882 fut nàscia sa funderia chi in is annus est stètia unu centru de produtzioni de antimòniu po s’Europa cun prus de cuatruxentus operajus.

In is u(r)timus annus de traballu sa funderia iat cumentzau a traballai minerali de atras minas de foras.

In is annus ’80 iant studau is forrus e is tènnicus e is minadoris iant serrau po sempri is gallerias. In is domus chi furiant de su diretori, de is tènnicus e de is ofìcius tènnicus e aministrativus funt pesendi domixeddas po is turistas.

lunis, su 05 cabudanni 2011 - Biddesatu - Imprenta