Bilinguismuimparis.net

Circa in su giassu
Sìnnia :: News

Sìnnia. Is crèsias

Sìnnia. Is crèsias

Is crèsias prus antigas de su logu, funt sa de Santa Bràbara in Solanas e sa de Santa Forada acanta de Santu Gragòriu. Toteduas funt arromànigas e ancoras s’agàtant is murus e s’abìsidi. In prus, in sa cresiedda de Santa Bràbara fait a biri ancoras duus arrogus a ladu e unu campanileddu a bèntula. A canta ddoi funt arrastus de atrus murus chi iat a depi essi unu cunventu.

Is cresieddas de Santu Gragòriu e de Santu ‘Asili ancoras fait a ddas imperai. Sa de Santu Gragòriu dd’ant torrada a pesai in su 1818 e sa de Santu ‘Asili podit essi chi dd’essint fata po sa biddixedda de Biddanoa de Sant’‘Asili. Fiat una biddixedda mesuevali chi si fiat spopulada intr’‘e su Trexentus e su Cuatruxentus.

Arrastrus de atras crèsias no nd’at, mancai chi scieus chi nci fiant e calis fiant:
- Santu Sadurru, sa primu crèsia de arretori de Sìnnia, fata faci a su 1100, chi agoa dd’ant arremprasada cun sa crèsia de Santa ‘Itòria.
- Santu Marcu, podit essi chi fessit sa crèsia de arretori de Segossini, dd’ant sciusciada in su 1858 po lassai logu a su Comunu, in Pratz’‘e Crèsia. Is duas biddixeddas de Sìnnia e Segossini si funt unias, fendi Sìnnia cumenti dda connosceus oi, faci a su Cuatruxentus.
- Santa ‘Itroxa, faci a Srepeddi’.
- Santu Bratzolu, chi ant fatu sa noa de pagu.
- Santu Giorgi, Sant’ ‘Asili Minori e Tasonis, totus in su sartu.
- sa crèsia de arretori de Santu Pedru in Solanas, chi in is arrastus ant agatau una pedra manna de craciari cun sa scrita + SANCTI SATURNINI. Is annus trinta de su Noixentus ant fatu sa cresia noa de Santu Giusepi e pagus annus a oi sa crèsia manna moderna.
- sa crèsia de Santu Giusepi Patriarca, a canta de unu cunventeddu in Seti Fradis. A sa perra de s’Otuxentus ddoi fiant andau is paras trapistas po agiudai is pastoris de ingunis.

In prus s’agàtant custas atras crèsias, chi ddas impèrant in is diis de sa festa de is santus e totu:
Sant’Aleni. Fiat sciorrocada in su 1790 e dd’ant torrada a pesai in su 1926.
Santu Còsumu e Damianu, fiat arruendinci in su 1730, is stàtus nci ddas iant betias a sa crèsia de Santa Barbara, e dd’ant torrada a pesai in su 1948.

Sa cresia de Santa ‘Itòria dda arremònant sa primu ‘orta in d-unu dogumentu de su 1141 (Cartulaire de l’Abbadye de Saint Victor de Marseille). De cumenti fiat arromàniga a tres navadas no nd’abàrrat nudda, ca a sa perra de s’Otuxentus unu lampu ndi dd’iat mesu sciorrocada e dd’iant torrada a fai.

Sa cresiedda de Santu Sidoru, fata a sa perra de su Setixentus, dd’ant sciusciada e fiat innui imoi est sa crèsia noa de Santu Sidoru e totu chi ant fau in su 1978.

Su prus de sa sienda de arti arreligiosa est in sa crèsia de Santa Bràbara. Est in pitzu de unu de is cùcurus prus artus de bidda e su logu fiat a metadi ‘e tretu intr’‘e Segossini e Sìnnia. Podit essi chi ddoi fessit s’arretori giai de su Trexentus ma su primu testimòngiu siguru est de 1586 o 1596.
Fiat gòtiga-aragonesa e a su cumentzu teniat sa navada de centru sceti, cun tres aposentus a manu dereta e unu sceti a manu manca. Dd’ant amannida in su Sescentus, fendi is transeddus e s’abìsidi. In su 1641 ant artziau sa cùpola e podit essi chi in su tempus e totu apant bogau is carrus armaus de linna e apant fatu sa bòvida chi ddoi est imoi e totu. Is aposentus a manu manca ddus ant fatus in su Setixentus.
Su campanili s’agatàt giai de su 1586, dd’iant torrau a fai in su 1796 ma in su 1862 totu sa parti de pitzus ndi fiat arruta a su noti, chentz’‘e ‘ociri a nisciunus.
In su 1870, de cumenti iant bèndiu prata de sa crèsia e pinnigau dinai de sa genti, ant fatu su campanili de sa crèsia cumenti ddu bieus imoi. Duas campanas funt de su 1601 e de su 1607. Is atras duas fiant de su 1730 ma ddas ant torradas a fai in su 1955.


[Fotografia de sa crèsai de Santu Còsimu, de Amos Cardia]

martis, su 01 cabudanni 2011 - Sìnnia - Imprenta