Bilinguismuimparis.net

Circa in su giassu
Brucei :: News

Brucei. Sa bidda e ita abisitai

Brucei. Sa bidda e ita abisitai

Sa bidda

Sa bidda est a 650 metrus de artària e, in sa provìntzia de Casteddu, est sa chi prus tenit unu naturali de logu de monti. De monti est totu su sartu puru, cun padentis e mitzas, bellu meda po sa pastoria, chi difatis fait una parti manna de s’economia de sa bidda.
Atrus logus funt po is ortus, is bìngias, su lori e, prus de totu, sa cerexa chi s’est fata famada. Sa bidda, chi ancoras ddoi funt domus fatas a s’antiga, est in d-una costera de unu cùcuru de Serpeddì, faci a obrescidroxu, e s’est alladiau partendi de tres pratzas stòricas.

Su nòmini de sa bidda iat a benni de su fueddu sardu burrei, chi est unu tallu de bois o de bacas, pròpiu po is fainas de pastoria de sa bidda, chi dda iant a essi fundada una truma de pastoris brabaxinus. Po s’abundori de àcua e de pastura, s’iant a essi postus in sa Mitza de su Sàlixi, chi finsas a unas dexenas de annus a oi si agatat ancoras in mesu de sa bidda.


Ita abisitai

Sa crèsia de Sennora Nosta de Munserrau. Dd’iat fata in su 1886 Gaetanu Cima s’architetu, tenit una forma de otàgunu e capellas a is ladus. S’afaciada est neocràssica, a tìmpanu e colunnas e su campanili est artu.

Foras de sa bidda fait a agatai logus spantosus po sa naturalesa e po sa mirada a is montis de Serpeddì e de Seti Fradis. Unu po totus, su padenti de ìlixi e de ùlimu de Brabaisu, bastanti acanta a sa bidda.

Fait a papai beni puru, ca agatais casu bonu de craba e de brebei, su pani de sìmbula cotu in su forru a linna e su salùmini fatu in domu, mancai pagu. Famada est sa cerexa, manna e saboria, chi dònnia annu in làmpadas faint sa festa e benit genti meda de dònnia logu.

Atras festas funt su 6 de làmpadas po Santa Bràbara, in austu sa de Sa Petza de Craba, chi craramenti fait a ndi papai, e s’8 de cabudanni po sa Santa de sa bidda, Sennora Nosta de Munserrau.


[Fotografia de Amos Cardia
]

giòbia, su 20 mesi de ladàmini 2011 - Brucei - Imprenta