Bilinguismuimparis.net

Circa in su giassu
Brucei :: News

Brucei. Monumentus naturalis 1

Brucei. Monumentus naturalis 1

ARCO DELL’ANGELO – Arcu de s’Àngiulu

Arcu de s’Àngiulu est su nòmini de unu tretu de sa Bia Statali 125 bècia, de su km 41 a su km 44, fata in su gùturu de s’Arriu de Picoca. Custu gùturu, fundudu e cun costeras no simètricas, est spantosu po is murus de arroca, de tellas mannas mannas e lìmpias. In pagus logus cumenti innoi fait a biri sa strutura de su graniu, bessiu a foras cun movimentus de spinta, de segadura e de liscinamentu, chi a s’acabu arresurtat bella meda pròpiu ca pagu arregulari, cun totu custus movimentus amesturaus.
Su fundu de su gùturu est a un’artària in pitzus de mari prus o mancu de 60 metrus e is cùcurus no funt prus artus de 300 o 400 metrus ma, mancai custu, po cumenti su logu est trumentau, parit de essi in monti prus artu meda.
In mesu a su graniu fait a biri filadas de cuartzu, pòrfidu e atras arrocas, fendi bessiri serras e sperefundus de bellesa manna. S’arroca est lìmpia ca s’àcua calendi ndi bogat totu su chi ddoi podit cresci e su fundu de su gùturu est prenu de pedra manna bessia tunda gràtzias a s’àcua etotu.
Su tempus mellus po amirai custa bellesa de su gùturu est in làmpadas, candu frorit su leunaxu e duncas a su colori birdi de is matas e arrosa de su graniu s’aciungit su colori tannau de is froris.

giòbia, su 15 cabudanni 2011 - Brucei - Imprenta