Bilinguismuimparis.net

Circa in su giassu
Sìnnia :: News

Sėnnia. Su biaxu est unu trumentu

Sėnnia. Su biaxu est unu trumentu

Funt protestendi po totu is strobus is studiantis chi abitant is scolas de Pitz''e Serra

Serreli fait un'interrogu in sa Provìntzia po fai connosci custus problemas

Is strobus po is studiantis chi de Sìnnia, Sètimu e Mara calant a Cuartu po andai a scola est andendi ainnantis de diora. Unu problema chi est faendi protestai studiantis e is babus insoru. Una chistioni chi est lòmpia a Provìntzia gràtzias a s'interrogu de Sandro Serreli, su sìndigu bèciu de Sìnnia e imoi consilleri de Sel in sa Provìntzia. "De annus, is piciocus chi andant a is scolas de Pitz''e Serra de Cuartu – at scritu Sandro Serreli – depint fai su biaxu de manera chi no est bona nudda nudda. Is postalis de s'Arst funt sèmpiri prenus. No fait a sceberai: nci depint artziai chi no bolint abarrai in sa bidda insoru o chi no bolint furriau a domu a trigadiu meda. Tocat a intendi – at propostu Serreli – a is Sìndigus de custas biddas, is dirigidoris scolàsticus e s'Arst po agatai, a sa bon'ora, sa manera de sciolli custa chistioni chi est bècia de annus".
A custu interrogu de Sel at torrau sceda su Presidenti de sa Provìntzia, Angela Quaquero. "Impari a s'assessori a s'Imparu Pùblicu e cun sa cumissioni provintziali de is trasportus – eus a arrexonai illuegus de custu problema. Sa tenta nosta est a agatai su prus a chitzi che fetzat una manera de fai acabai custa situatzioni".
Is strobus de is studiantis de Sìnnia, Mara e Sètimu chi abitant su scientìficu e s'istitutu tènnicu de Pitz''e Serra funt cumentzaus illuegus candu est inghitzada sa scola. "Is piciocus nostus – narat Antonio Forte, unu de is babus – depint amarolla fai custu biaxu de mala manera. Intipius in is postalis. S'Arst depit agatai illuegus una solutzioni, ponendi in s'arruga prus postalis. Sendi chi in prus, is piciocus pagant sèmpiri s'abonamentu".

Artìculu de Antonio Serreli, pigau e tradùsiu de L'Unione Sarda de giòbia su 1 de su mesi de donniasantu.

cenàbara, su 02 donniasantu 2012 - Sìnnia - Imprenta