Bilinguismuimparis.net

Circa in su giassu
Sìnnia :: News

Sėnnia. Mai prus fileras de veturas in s'arruga de su mari

Sėnnia. Mai prus fileras de veturas in s'arruga de su mari

Arruga 554 e Orientali noa, bagàntzias acabadas e tràficu lestru. In su mesi de idas aberint su tunnel nou

Tràficu acabau. Is fileras chena de acabu in s'arruga po andai a Crabonaxa funt giai un'arregordu. Oi ca is bagàntzias funt acabendi, a chitzi ca at a fai a pigai àteras arrugas puru, cosa chi abetaus de assumancu trinta annus. In su mesi de idas ant a aberri su tunnel de Is Canaleddus e duncas su primu arrogu de s'Orientali noa de sa 554 noa a is Canaleddus. Su tunnel est acabau e imoi funt traballendi a lestru po fai is bessidas mannas chi at a permiti a is veturas di intrai in s'Orientali noa chena de lompi a Terra Mala e chena de depi passai po Cala Regina. Is strobus a contu fatu funt acabaus diaderus e is veturas ant a podi arribai a is costas de su Sàrrabus e a s'Ollasta debressi. Custu torrat contu a s'economia de su logu. "Chena duda peruna", narat Eugenio Murgioni, consilleri arregionali e ex-sìndigu de Castiadas. "Is costas nostas ant a fai a ddas lompi debressi chena de strobus o fileras chi s'acumpàngiant de annus. Sa 554 noa e s'Orientali sarda noa ant a fai arribai prus turistas cun totu is logus de mari chi fait a lompi de is bessidas suas: seu chistionendi de Geremeas, Turri de su Fenugu, Crabonaxa, Castiadas, Costa Rei, Porto Corallo: un'arruga lestra chi donniunu at a podi sceberai chi no bolit fai sa panoràmica, un'arruga spantosa po su panorama chi no eus a abandonai".
Barbara Pusceddu puru, sìndiga de Sìnnia, est satisfada. "A aberri arrugas noas est sèmpiri unu sucessu po s'economia e su traballu: s'Orientali noa at a incurtzai su tempus chi serbit po lompi a su logu de is bagàntzias o po andai a traballai, e custu si torrat a contu a totus".
Maria Antonietta Schirru est una dotora setimesa chi bivit in Arroma. Dònnia istadi fait is bagàntzias in Ollasta. "Po annus apu fatu s'arruga 125: un'arruga bella meda ma cun garronadas medas. Femu abetendi custa arruga noa de diora. Imoi sciu chi s'istadi chi benit apu a lompi a Ollasta debressi e chena mi fadiai". Piero Loddo, consilleri comunali de Murera narat: "Fatzu sa 125 bècia de annus medas: sciu totu is medas garronadas e is pagus arrogus deretus. Ddus portu in su coru. Candu no apu a tenni pressi de furriai a domu o de lompi a Casteddu o a Cuartu, apu a sighiri a dda fai. Siguru est chi s'arruga noa est una cunchista manna po totus: nci ant postu dexenas de annus de traballu po dda fai, cun cuntierras puru apitzu de su mori suu. Calincunu boliat un'arruga de monti ma a s'acabu ant sceberau custa arruga chi si acostat a su mari".
Imoi tocat a abetai is ùrtimus traballus. S'Anas est arrespetendi su tempus cuncordau: intra tres mesis s'ùrtimu arrogu puru de custu grandu progetu iat a depi essi acabau donendi a totus un'arruga moderna".


Artìculu de Antonio Serreli, pigau, arrangiau e tradùsiu de s'Unione Sarda de lunis su 3 de su mesi de cabudanni.

giòbia, su 13 cabudanni 2012 - Sìnnia - Imprenta