Bilinguismuimparis.net

Circa in su giassu
Brucei :: News

Brucei. Bessidas e intradas de sa 554 noa, trāficu amachiau

Brucei. Bessidas e intradas de sa 554 noa, trāficu amachiau

Fileras de veturas e strobus po is chi fiant andendi a mari

Cun sa bessida serrada, millas e millas de veturas, lòmpius a s'ingruxada de Gannì, ant desviau po Frùmini, andendi apustis a bellu a bellu is arrughixeddas chi s'Anas at consillau.

Un'àteru domìnigu de trumentu in is arrugas de is bagàntzias. A mangianu e a merii, una situatzioni aforas de su normali asuta de unu soli chi scallàt is pedras e sa genti arrenneghendi-sì po is aparcadòrgius de Geremeas cun is vetureris chi ant tzerriau a amachiadura is carabineris de Cuartu. Boliant sciri chi is aparcadòrgiu de mari fiant a pagai o a indonu. Su barrancu duncas no est arrodiadora de is Canaleddus, acanta de Geremeas. Ma est prus che totu su de ai serrau s'arruga chi de s'Orientali bècia nc'intrat in sa 554 noa. Cun su tràficu mannu chi si nci ghetat in s'arruga provintziali de Frùmini faendi avolotu.

Intrada. A ai serrau su 14 de maju s'intrada manna, chi funt faendi-dda de annus e annus, candu s'Anas ddu iat nau iat fatu impensamentai e inchietai sa genti chi cussa arruga dda fait po andai e torrai e is primus turistas. Si depeus pensai ita acontessit imoi chi s'Anas at nau chi at a essi serrada assumancu finsas a su 15 de mesi de argiolas. Una tzacada manna a su mundu de is bagàntzias, in d-una de is prus arrugas traficadas e progetada po fai arribai is veturas de sa 554 noa po Terra Mala a s'Orientali noa. S'arresurtau est chi ariserus puru s'arruga de is bagàntzias est bessia una Babilònia.

Sa desviadura. Cun s'intrada serrada, millas e millas de veturas lòmpias a s'ingruxada de Gannì (Mara), ant desviau po Frùmini, passendi a bellu a bellu po arrughixeddas chi s'Anas at inditau, abetendi chi torrint a aberri s'intrada de sa 554 noa. Millas de veturas andendi e torrendi, in mesu de furriotus e asuta de unu soli chi ndi scallat is pedras. Ma poita est chi no funt arrennèscius a arrespetai sa dii chi iant nau chi iant a ai acabau de traballai (chi si pensànt chi fessit su 15 de làmpadas)?

Sa spricadura.
“Boleus chi s'Anas si sprichit totu”, narat Antonio Monni s'inginneri consilleri comunali de Brucei. “Sa situatzioni est paradossali. Sa genti de Brucei no nci dda faint prus. Is turistas depint fai girus e giriteddus po arrughixeddas e carteddus chi no funt sèmpiri crarus. Mi speru chi assumancu sa dii de su 15 de mesi de argiolas dda ant a arrespetai”.

Interrogu.
Sèmpiri Monni at presentau unu interrogu in su Comunu. “In is àteras arrugas comunalis e provintzialis chi tocat a fai, finsas a candu no est pronta s'arruga noa, nci funt medas cantieris e duncas nci funt àterus barrancus. Su strobu – fait a ligi in s'interrogu – est po nexi de sa perigulosidadi de is arrugas, firmadas de is cantieris, siat a su tempus in prus chi nci bolit po dda fai. Ma po su fatu chi is chi passant po custa arruga imperant prus benzina o gasollu. Imoi tocat a tzerriai a forti po fai cumentzai a fai s'arruga noa po Mara”.

Artìculu pigau e tradùsiu de s'Unione Sarda de lunis su 25 de su mesi de làmpadas.
 

lunis, su 25 làmpadas 2012 - Brucei - Imprenta